చెన్నై:ప్రముఖ నటుడు విజయ్ ఆంటోనీ ఇంట విషాదం చోటుచేసుకుంది. ఆయన 16 ఏళ్ల కుమార్తె మీరా ఆత్మహత్య చేసుకుంది. విజయ్ ఆంటోనీ తన కుటుంబంతో చెన్నై అల్వార్పేటలోని డీడీకే రోడ్డులో నివసిస్తున్నారు. చర్చ్ పార్క్ స్కూల్లో మీరా పన్నెండో తరగతి చదువుతోంది. తెల్లవారుజామున 3 గంటల సమయంలో ఇంట్లో దుపట్టాతో ఉరివేసుకుంది. గమనించిన కుటుంబ సభ్యులు వెంటనే కావేరీ ఆసుపత్రికి తరలించారు. పరీక్షించిన వైద్యులు మీరా అప్పటికే మృతి చెందినట్టు నిర్ధారించారు. సమాచారం అందుకున్న పోలీసులు కేసు నమోదు చేసుకుని దర్యాప్తు ప్రారంభించారు. కుమార్తె ఆత్మహత్య సమయంలో ఆంటోనీ ఇంట్లో లేరని సమాచారం. మీరా ఆత్మహత్యకు ఒత్తిడే కారణమని తెలుస్తోంది. మీరా గతకొంత కాలంగా డిప్రెషన్తో బాధపడుతూ చికిత్స కూడా తీసుకుంటోందని సమాచారం.