యశ్ హీరోగా ప్రశాంత్ నీల్ దర్శకత్వంలో రూపొందిన ‘కేజీఎఫ్ 2’ తొలి రోజునే కొత్త రికార్డును నమోదు చేసింది. ఇక అక్కడి నుంచి వెనుదిరిగి చూడకుండా తన ప్రయాణాన్ని సాగించింది. అంతకుముందున్న రికార్డులను అధిగమిస్తూ వెళుతోంది. ఈ నేపథ్యంలో హిందీ వెర్షన్ వసూళ్లు ‘దంగల్’ రికార్డును దాటేసింది.
ఇంతవరకూ హిందీలో 511.3 కోట్లను సాధించి ‘బాహుబలి 2’ మొదటి స్థానంలో ఉంటే, 387.4 కోట్ల వసూళ్లతో ‘దంగల్’ రెండో స్థానంలో నిలిచింది. ఇప్పుడు ఈ రికార్డును ‘కేజీఎఫ్ 2’ అధిగమించింది. నిన్నటి వసూళ్లతో కలుపుకుని 391.65 కోట్లను రాబట్టిన ‘కేజీఎఫ్ 2’ .. ‘దంగల్’ స్థానాన్ని ఆక్రమించేసి, ఆ సినిమాను మూడో స్థానంలోకి నెట్టేసింది.
ఇక ప్రపంచవ్యాప్తంగా చూసుకుంటే ‘ కేజీఎఫ్ 2’ 1000 కోట్ల మార్కును దాటేసింది. త్వరలో 1100 కోట్ల క్లబ్ లోకి చేరడం కూడా ఖాయమేనని అంటున్నారు. అలాగే బాలీవుడ్ లోను అవలీలగా 400 కోట్ల క్లబ్ లోకి అడుగుపెడుతుందని చెబుతున్నారు.