సాధారణంగా పెళ్లికార్డులను అత్యంత ఆకర్షణీయంగా రూపొందించి అతిథులకు అందించాలని కోరుకుంటారు. ఎవరిస్థాయికి తగిన విధంగా ఆ పెళ్లిపత్రికలను అందంగా ముస్తాబు చేస్తుంటారు. అయితే కన్నడ యువ హీరో చేతన్ మాత్రం తన వివాహ శుభలేఖలో పర్యావరణ హితాన్ని జోడించి అందరికీ స్ఫూర్తిగా నిలుస్తున్నారు. మేఘ అనే సామాజిక ఉద్యమకారిణితో చేతన్ పెళ్లి ఫిబ్రవరి 2న జరగనుంది. ఈ నేపథ్యంలో చేతన్ తన పెళ్లికార్డులో కొన్ని విత్తనాలను అతిథులకు అందిస్తున్నాడు. ఆ శుభలేఖలో విత్తనాలు అంటించి ఉన్న ఓ ప్రత్యేకమైన భాగాన్ని భూమిలో నాటి నీరు పోస్తే చాలని, అవి మొక్కలుగా పెరిగి పర్యావరణ పరిరక్షణకు ఉపయోగపడతాయని చేతన్ పిలుపునిచ్చాడు.చేతన్ తల్లిదండ్రులు తమ కుమారుడి పెళ్లిని ఎంతో ఘనంగా నిర్వహించాలని భావించారు. కానీ, పెళ్లికోసం ఇంత ఖర్చు చేయడం ఎందుకని భావించిన ఆ యువ హీరో వినోబాభావే ఆశ్రమంలో నిరాడంబరంగా వివాహం చేసుకోవాలని నిర్ణయించుకున్నాడు. అత్యంత ఆడంబరంగా పెళ్లి చేసుకుని తమ స్టేటస్ చాటాలని ప్రయత్నించే వారున్న ఈ కాలంలో చేతన్ లాంటి వాళ్లు నిజంగా ఆదర్శప్రాయులే!