హైదరాబాద్ : పార్టీ జిల్లా కార్యాలయాల నిర్మాణం దసరా నాటికి పూర్తి చేయాలని తెరాస అధినేత, ముఖ్యమంత్రి కేసీఆర్ పార్టీ నాయకులకు నిర్దేశించారు. తెలంగాణ భవన్‌లో పార్టీ ముఖ్య నేతలతో బుధవారం ఆయన సమావేశమయ్యారు. ఈ సందర్భంగా జిల్లా కార్యాలయాల నిర్మాణం, పార్టీ సభ్యత్వ నమోదు తదితర అంశాలపై చర్చించారు. అన్ని జిల్లాల్లో పార్టీ కార్యాలయాలు నిర్మించాలని పార్టీ నిర్ణయించింది. ఇప్పటికే 29 జిల్లాల్లో శంకుస్థాపనలు పూర్తయ్యాయి. పార్టీ కార్యాలయాల నిర్మాణానికి సంబంధించిన బాధ్యులకు ఈ సందర్భంగా చెక్కులు అందజేశారు. ఒక్కో భవన నిర్మాణానికి రూ.60 లక్షల చెక్కును, భవన నిర్మాణ ప్రణాళికను అందించారు. రాష్ట్ర వ్యాప్తంగా జరుగుతున్న సభ్యత్వ నమోదుపై ఆయన సంతృప్తి వ్యక్తంచేశారు. ఈ సందర్భంగా పోడు భూముల వ్యవహారాన్ని కొత్తగూడెం ఎమ్మెల్యే వనమా వెంకటేశ్వరరావు ముఖ్యమంత్రి దృష్టికి తీసుకొచ్చారు. పోడు రైతులను అటవీ శాఖ అధికారులు వేధిస్తున్నారని ఫిర్యాదు చేశారు. త్వరలో వీటన్నింటినీ పరిష్కరిస్తామని సీఎం హామీ ఇచ్చారు.
