సిద్దిపేట: పంచాయతీ ఎన్నికల్లో భాగంగా జిల్లాలో తొలివిడత నామపత్రాల దాఖలు ప్రక్రియ బుధవారంతో ముగిసింది. చివరి రోజు సర్పంచి, వార్డు సభ్యుల స్థానాలకు భారీ సంఖ్యలో నామపత్రాలు దాఖలు అయ్యాయి. ఈనెల 7న ప్రారంభమయిన ప్రక్రియ బుధవారంతో ముగిసింది. ఎంపీడీవో కార్యాలయాలకు సాయంత్రం 5 గంటల లోపు చేరుకున్న అభ్యర్థులందరికీ టోకెన్లు జారీ చేసి రాత్రి వరకు నామపత్రాలు స్వీకరించారు. జిల్లాలో తొలివిడత ఎన్నికలు సిద్దిపేట డివిజన్‌లో దౌల్తాబాద్‌ మండలం మినహాయించి మిగిలిన తొమ్మిది మండలాల్లో 186 గ్రామ పంచాయతీలు, 1712 వార్డులకు ఎన్నికలు జరగనున్నాయి. ఈ నేపథ్యంలో మూడు రోజుల్లో కలిసి 9 మండలాల్లో సర్పంచి స్థానాలకు 1,609, వార్డు సభ్యులకు 5,223 నామపత్రాలు దాఖలయ్యాయి. చివరి రోజు బుధవారం సర్పంచి పదవులకు 948, వార్డు సభ్యుల స్థానాలకు 3,502 నామినేషన్‌ పత్రాలు దాఖలయ్యాయి. చివరి రోజు భారీ సంఖ్యలో నామపత్రాలు దాఖలు కావడం విశేషం.