சேலம்:

சேலத்தில் புதிய சட்டக்கல்லூரியை தமிழக முதல்வர் எடப்பாடி பழனிச்சாமி இன்று திறந்து வைத்தார்.

சேலத்தில் புதிதாக திறக்கப்பட்ட சட்டக்கல்லூரியின் திறப்பால், தமிழகத்தில் சட்டக்கல்லூரிகளின் எண்ணிக்கை 14 ஆக உயர்ந்துள்ளது.

இந்த சட்டக்கல்லூரியில் 3 ஆண்டுகால சட்டப்படிப்புக்கு 80 இடங்களும், 5 ஆண்டுகால சட்டப்படிப்புக்கு 80 இடங்களும் நிரப்பப்பட உள்ளன. கல்லூரியின் அலுவலராக கோவை அரசு சட்டக்கல்லூரியின் முதல்வர் கோபாலகிருஷ்ணன் நியமனம் செய்யப்பட்டுள்ளார்.

இந்த விழாவில் தமிழக சட்டத்துறை அமைச்சர் சி.வி.சண்முகம் மற்றும் சட்டமன்ற உறுப்பினர்கள், அரசு அதிகாரிகள் உள்ளிட்ட பலர் பங்கேற்றனர்.