மதுரை அரசு மருத்துவமனையில் மின்சாரம் துண்டிக்கப்பட்டதால், ஆக்சிஜன் கிடைக்காமல் 3 நோயாளிகள் உயிரிழந்த சம்பவம் அதிர்ச்சியை ஏற்படுத்தியுள்ளது.

மதுரையில், நேற்று மாலை இடி, மின்னலுடன் கூடிய மழை பெய்துள்ளது. இதனால், அப்பகுதியில் பல இடங்களில் மின்வயர்கள் அறுந்து விழுந்ததில், பல இடங்களில் மின்சாரம் துண்டிக்கப்பட்டதாக கூறப்படுகிறது. இதே போன்று மதுரை அரசு ராஜாஜி மருத்துவமனையிலும் மின்சாரம் துண்டிக்கப்பட்டுள்ளது. எனினும், ஜெனரேட்டர் உடனடியாக இயக்கப்பட்டுள்ளது. ஆனால், அதுவும் பழுதடைந்துவிட்டதாக கூறப்படுகிறது. இதனால், மருத்துவமனை முழுவதும் இருளில் மூழ்கியுள்ளது.

இந்த நிலையில், அவசர சிகிச்சை பிரிவு, தலை காய சிகிச்சை பிரிவில் வென்டிலேட்டர் கருவிகளும் மின்சாரம் செயல்படவில்லை. ஆக்சிஜன் கிடைக்காமல், அந்த சிகிச்சை பிரிவில் இருந்த நோயாளிகளுக்கு மூச்சுத்திணறல் ஏற்பட்டதாக கூறப்படுகிறது. இதில், 3 நோயாளிகள் அடுத்தடுத்து உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.

இதில், மதுரை அருகிலுள்ள பூஞ்சுத்தையைச் சேர்ந்த மல்லிகா (55), ஸ்ரீவில்லிபுத்தூரைச் சேர்ந்த ரவிச்சந்திரன் (55), ஒட்டன்சத்திரத்தைச் சேர்ந்த பழனியம்மாள் (60) ஆகியோர் என்று தெரியவந்துள்ளது. மூவரும் தீவிர சிகிச்சை பிரிவில் மிகவும் கவலைக்கிடமான நிலையில், தான் சிகிச்சை பெற்று வந்ததாக கூறப்படுகிறது. இதையடுத்து, உயிரிழந்தவர்களின் உறவினர்கள் மருத்துவமனை ஊழியர்களிடம் வாக்குவாதத்தில் ஈடுபட்டுள்ளனர். மேலும், மருத்துவமனையில் போராட்டத்தில் ஈடுபட்டுள்ளனர்.

இதையடுத்து, இச்சம்பவம் குறித்து அறிந்த போலீசார் மருத்துவமனைக்கு விரைந்து வந்து உறவினர்களை சமாதானப்படுத்தி விசாரணை மேற்கொண்டுள்ளதாகவும் கூறப்படுகிறது. இந்த உயிரிழப்பு குறித்து மருத்துவமனையின் தலைமை மருத்துவர் வனிதா கூறுகையில், கவலைக்கிடமான நிலையில், மருத்துவமனையில் சிகிச்சைக்காக அனுமதிக்கப்பட்டிருந்தனர். ஆனால், சிகிச்சை பலனின்றி அவர்கள் உயிரிழந்துள்ளனர் என்பது குறிப்பிடத்தக்கது.

இதற்கிடையில், மருத்துவமனையில், மின் தடையால் உயிரிழந்தவர்களின் எண்ணிக்கை 5 ஆக உயிரிழந்துள்ளதாக தகவல் வெளியாகியுள்ளது.