சென்னை:

ராஜீவ் காந்தி கொலை வழக்கில் தொடர்புடைய 7 பேரை விடுவிக்கும் விவகாரத்தில் ஆளுநருக்கு அழுத்தம் கொடுக்க வேண்டாம் என தமிழக காங்கிரஸ் தலைவர் கே.எஸ்.அழகிரி தெரிவித்துள்ளார்.

ராஜீவ்காந்தி கொலை வழக்கில், பேரறிவாளன், சாந்தன், முருகன் உள்ளிட்ட 7 பேரை விடுதலை செய்ய நீண்ட நாட்களாக கோரிக்கை எழுந்தது. இதனையடுத்து, தமிழக சட்டப்பேரவையில் தீர்மானம் கொண்டுவரப்பட்டு, ஆளுநரின் முடிவுக்கு அனுப்பப்பட்டது.

இதனை எதிர்த்து, உச்ச நீதிமன்றத்தில் தொடர்ந்த மனு மீதான விசாரணையில், ராஜீவ் கொலை வழக்கில் தொடர்புடைய 7 பேரின் விடுதலை செய்வது குறித்து தமிழக ஆளுநரே முடிவு செய்யலாம் என அவர்களுக்கு எதிராக தொடுக்கப்பட்ட மனுவை உச்சநீதிமன்றம் தள்ளுபடி செய்து இன்று உத்தரவிட்டுள்ளது.

இதுகுறித்து தமிழக காங்கிரஸ் தலைவர் கே.எஸ்.அழகிரி கூறுகையில், ராஜீவ் காந்தி கொலைக் குற்றவாளிகளான பேரறிவாளன் உள்ளிட்ட 7 பேர் விடுதலை குறித்து, இப்படித்தான் முடிவெடுக்க வேண்டும் என்று ஆளுநருக்கு அழுத்தம் கொடுக்கக்கூடாது.  குற்றவாளிகளை மன்னித்துவிட்டோம் என கட்சி தலைமை ஏற்கெனவே கூறிவிட்டது. எதுவாக இருந்தாலும் சட்டத்துக்கு கட்டுப்பட்டே நடக்க வேண்டும் என்று அவர் தெரிவித்தார்.