దక్షిణాఫ్రికా పేస్‌ బౌలర్‌ డేల్‌ స్టెయిన్‌ 437 వికెట్లను సాధించడం ద్వారా ఘనత సాధించాడు. టెస్టు క్రికెట్‌లో అత్యధిక వికెట్లు తీసిన బౌలర్ల జాబితాలో ఏడో స్థానంలో నిలిచాడు. డర్బన్‌లో శ్రీలంకతో జరుగుతున్న తొలి టెస్టు మొదటి ఇన్నింగ్స్‌లో స్టెయిన్‌ ఈ మైలు రాయిని చేరుకున్నాడు. నాలుగు వికెట్లను తీసుకోవడం ద్వారా అతను కపిల్‌ దేవ్‌ (434 వికెట్లు) రికార్డును అధిగమించాడు. అతనికిది 92వ మ్యాచ్‌.   ఇప్పటికే ఇంగ్లండ్‌కు చెందిన స్టువర్ట్‌ బ్రాడ్‌ కూడా 437 వికెట్లను సాధించాడు. ముత్తయ్య మురళీ ధరన్‌(శ్రీలంక-800 వికెట్లు) తొలి , షేన్‌ వార్న్‌(ఆస్ట్రేలియా-708) రెండో స్థానాల్లో ఉన్నారు. అనిల్‌ కుంబ్లే (619), జేమ్స్‌ అండర్సన్‌ (ఇంగ్లండ్‌-575), మెక్‌గ్రాత్‌(ఆస్ట్రేలియా-563), కర్ట్నీ వాల్ష్‌( వెస్టిండీస్‌-516)లు ఆ తర్వాత స్థానాల్లో ఉన్నారు.