చెన్నై : వీరిద్దరూ సినీ దిగ్గజాలే. ఒకరు నటనలో, మరొకరు సంగీతంలో. వారెవరో కాదు…కమల్ హాసన్, ఏఆర్ రెహ్మాన్. కమల్ నటించిన భారతీయుడు, తెనాలి చిత్రాలకు రెహమాన్ సంగీతం అందించారు. దాదాపు 19 ఏళ్ల తర్వాత వీరిద్దరూ మరోసారి కలిసి పనిచేయబోతున్నారు. కమల్ నటిస్తున్న ‘తలైవన్ ఇరుక్కిండ్రాన్’ చిత్రానికి రెహమాన్ సంగీతం అందించనున్నారు. ఈ విషయాన్ని ట్విటర్ వేదికగా కమల్ ప్రకటించారు. నీ భాగస్వామ్యంతో చిత్ర బృందానికి మరింత బలాన్ని ఇచ్చినందుకు ధన్యవాదాలు రెహమాన్ అంటూ కమల్ పేర్కొన్నారు. మనం స్క్రిప్టును ఎంతగా మెరగు పరిచినా కొన్ని సినిమాలు మాత్రమే సరైన సంతృప్తినిస్తాయని, వాటిలో ‘తలైవన్ ఇరుక్కిండ్రాన్’ ఒకటని తెలిపారు. ఈ సినిమా కోసం మీరు చూపుతున్న అత్యంత శ్రద్ధాసక్తులు మిగిలిన చిత్రబృందానికి కూడా పంచుతానని పేర్కొన్నారు. ‘తలైవన్ ఇరుక్కిండ్రాన్’ రాజకీయ నేపథ్యంలో తెరకెక్కుతోంది. లైకా ప్రొడక్షన్స్, రాజ్ కమల్ ఫిలింస్ ఇంటర్నేషనల్ సంస్థలు సంయుక్తంగా నిర్మిస్తున్నాయి.
