మాస్కో: యూరోపియన్ యూనియన్ విధించిన ఆంక్షలకు ప్రతీకారంగా రష్యా ఫ్రెంచ్ గయానా నుంచి తమ రాకెట్ ప్రయోగాలని రద్దు చేసినట్లు రష్యన్ స్పేస్ ఏజెన్సీ రాస్ కాస్మోస్ డైరెక్టర్ జనరల్ దిమిత్రీ రోగోజిన్ ట్వీట్ చేశారు. “రష్యా సంస్థలపై ఈయూ ఆంక్షలు విధించింది. దాంతో రాకెట్ ప్రయోగాలకు సంబంధించి యూరప్ లోని ఇతర భాగ స్వామ్య దేశాలకు సహకారం నిలిపివేస్తున్నాం. ఫ్రెంచ్ గయానాలోని కౌరూ కాస్మోడ్రోమ్ నుంచి రష్యా సాంకేతిక నిపుణులను, రాకెట్ ప్రయోగ సిబ్బందిని వెనక్కి పిలిపిస్తున్నాం” అని పేర్కొన్నారు. ఉక్రెయిన్ పై దాడి కి పాల్పడటంతో రష్యా సంస్థలు, సంపన్నులు, బ్యాంకుల లావాదేవీలపై ఈయూ ఆంక్షలు విధించింది. రష్యా అధ్యక్షుడు వ్లాదిమిర్ పుతిన్, రష్యా విదేశాంగ మంత్రి సెర్గీ లావ్రోవ్ ల ఆస్తుల స్తంభనకూ ఆమోదం తెలిపింది. ఇందుకు ఈయూలోని 27 సభ్య దేశాల రాయబారులు ముక్త కంఠంతో అంగీకరించారు.
