ప్రముఖ తెలుగు హీరో రాజశేఖర్‌ డ్రైవింగ్‌ లైసెన్స్‌ రద్దు చేస్తూ తెలంగాణ రాష్ట్ర రవాణశాఖ అధికారులు ఉత్తర్వులు జారీ చేశారు.వచ్చే ఏడాది మే నెల వరకు రాజశేఖర్‌ డ్రైవింగ్‌ లైసెన్స్‌ రద్దు చేశారు. గత నెల 13న ఔటర్ రింగ్‌రోడ్డుపై నిర్లక్ష్యంగా వాహనం నడిపి ప్రమాదానికి కారణమయ్యారంటూ రాజశేఖర్‌పై కేసు నమోదు చేసి, డ్రైవింగ్ లైసెన్స్‌ను రద్దు చేయాలని టోలీచౌకీ ఆర్టీఏ అధికారులకు శంషాబాద్ పోలీసులు లేఖ రాశారు.
కానీ ఆ తర్వాత తెలిసిన విషయం పోలీసులను విస్తుపోయేలా చేసింది. నిజానికి రాజశేఖర్ డ్రైవింగ్ లెసెన్స్ అసలు మనుగడలోనే లేదని తేలింది.2017లోనే రాజశేఖర్‌ డ్రైవింగ్‌ లైసెన్స్‌ కాలపరిమితి ముగిసినట్లు పోలీసులు గుర్తించారు.దీంతో షాకైన పోలీసులు డ్రైవింగ్ లైసెన్స్ లేకుండా వాహనం నడుపుతున్న నటుడిపై మరో కేసు నమోదు చేయాలని తాజాగా నిర్ణయించారు. రాజశేఖర్ వాహనంపై ఏడాదిలో 21 ట్రాఫిక్ ఉల్లంఘనలు ఉన్నట్టు తేలింది.వీటిలో 19 పరిమితికి మించిన వేగానికి సంబంధించినవే ఉన్నాయి. ప్రస్తుతం ఆయన లైసెన్స్ సస్పెన్షన్‌లో ఉండడంతో ఇప్పటికిప్పుడు పునరుద్ధరించుకోవడం సాధ్యం కాదని మే 28 తర్వాత మాత్రమే అది సాధ్యమవుతుందని సమాచారం. లైసెన్స్ లేకుండా అప్పటి వరకు వాహనం నడిపితే చట్టపరమైన చర్యలు తప్పవని పోలీసులు హెచ్చరించారు.