ఒకే భాష మాట్లాడే వారికి ఒకే రాష్ట్రం ఉండాలని పోరాడి ఆంధ్రప్రదేశ్ రాష్ట్రాన్ని సాధించుకున్న నాయకులు.. తెలుగు భాషను పరిరక్షించుకోవడంలో మాత్రం నిర్లక్ష్యం వహించారని జనసేన అధినేత పవన్‌కళ్యాణ్‌ ఆగ్రహం వ్యక్తం చేశారు.తిరుపతిలో తెలుగు వైభవం పేరుతో భాషా పండితులతో నిర్వహించిన ప్రత్యేక సమావేశంలో ఆయన మాట్లాడారు.ఆంగ్ల మాధ్యమానికి జనసేన పార్టీ వ్యతిరేకం కాదని, పిల్లలను ఏ మాధ్యమంలో చదివించాలో తల్లిదండ్రులకే స్వేచ్ఛ ఇవ్వాలని మాత్రమే కోరుతున్నామన్నారు. తెలుగు భాష… జ్ఞాన సరస్వతి.. అలాంటి భాషామూలలను చంపేయాలని చూస్తే ఆ జ్ఞాన సరస్వతే.. అపర దుర్గదేవిగా అవతారమెత్తి మిమ్మల్ని సర్వనాశనం చేస్తుందని పవన్ కళ్యాణ్ పరోక్షంగా జగన్ సర్కారును హెచ్చరించారు.మాతృ భాషను క్షుణ్ణంగా నేర్చుకుంటే ఏ భాషనైనా అవలీలగా నేర్చుకోవచ్చు. తెలుగు భాషను నేర్చుకోవడం ఓం తో మొదలుపెడతాం. దానర్ధం పరామాత్ముడు నుంచి విడిపోయావు మళ్లీ పరమాత్ముడి దగ్గరకే చేరాలని ఓంకారంతో భాషను నేర్పుతారు. సుమతి, వేమన శతకాలు చదివితే నైతిక బలం వస్తుంది. తప్పుడు పని చేయాలంటేనే భయమేస్తుంది‘ అని వ్యాఖ్యానించారు. చాలామంది తెలుగు హీరోలకు తెలుగు రాయడం సరిగారాదని, కొందరు సరిగా ఉచ్చరించలేరని పేర్కొన్నారు. వారికి తెలుగు సినిమాలు కావాలి, తెలుగులో డబ్బులు సంపాదించుకోవాలి కానీ తెలుగు మాత్రం రాయడం, పలకడం రాదు అంటూ విమర్శించారు.” ఈ విషయంలో ఓ హీరోగా నన్ను నేను మెరుగుపర్చుకున్నాను. ఇంకొకర్ని అనేముందు మనం నేర్చుకోవాలి కదా అనిపించింది. అందుకే నేర్చుకున్నాను. నేను యాక్టింగ్ నేర్చుకుంది సరస్వతి నమస్తుభ్యం అనే శ్లోకం నేర్చుకున్న తర్వాతే. మన భాషను, సంస్కృతిని పరిరక్షించుకోకపోతే అందరం అధోగతి పాలవుతాం” అంటూ పవన్ ఆందోళన వ్యక్తం చేశారు. తెలుగు సినీ పరిశ్రమలో పాండిత్యం రాను రాను దిగజారిపోతోంది. మన రచయితలకు శాస్త్రా, కావ్యాలు గురించి తెలియవు. మేడసాని మోహన్ వంటి గొప్ప అవధానులను ప్రేరణగా తీసుకుంటే గొప్ప గొప్ప సినిమాలు వచ్చేవి. తెలుగు సినిమా స్థాయి బూతులు, తిట్లు స్థాయికి పడిపోయింది. ఈ స్థాయికి ప్రమాణాలు దిగజారిపోయాయి కనుకే ఆడపిల్లలను రోడ్ల మీదే అత్యాచారాలు చేస్తున్నారు. మాతృభాషను మరచిపోతే వచ్చిన దుస్థితి ఇది. చాలా మంది తెలుగు హీరోలకు తెలుగు మాట్లాడం తెలుసో లేదో నాకు తెలియదు కానీ.. రాయడం మాత్రం సరిగా రాదు. తెలుగు సినిమాలు చేస్తారు. డబ్బులు ఇక్కడే సంపాదిస్తారు కానీ తెలుగు రాయడం, ఉచ్ఛరించడం మాత్రం తెలియదు. ఒక తెలుగు హీరోగా ఇవన్ని ఆవేదన కలిగించాయన్నారు..