ముంబై: మహారాష్ట్ర రాజకీయాల్లో అనూహ్యరీతిలో దేవేంద్ర ఫడ్నవీస్ సీఎంగా ప్రమాణస్వీకారం చేయడంలో చాప కింద నీరులా వ్యవహరించిన వ్యక్తి లోక్సభ సభ్యుడు , పార్టీ జాతీయ కార్యదర్శి భూపేంద్ర యాదవ్. కేంద్ర హోంశాఖ మంత్రి అమిత్ షాకు నమ్మినబంటు. ప్రభుత్వ ఏర్పాటు తమ వల్ల కాదని భాజపా నిస్సహాయతను వ్యక్తీకరించటం వ్యూహాత్మకమని ప్రత్యర్థులు గ్రహించేలోపే ఫడ్నవీస్ గద్దె ఎక్కారు. కేంద్ర మంత్రి నితిన్ గడ్కరీ రాజకీయాల్లో ఏమైనా జరగొచ్చని పదేపదే చెబుతుంటే ఎవరూ పెద్దగా పట్టించుకో లేదు. కానీ ఆయన వ్యాఖ్యల ఆంతర్యం ఇప్పుడర్థమవుతోంది. గత కొన్నిరోజులుగా ఎన్సీపీ నేత అజిత్ పవార్ తో భూపేంద్ర యాదవ్ రహస్యంగా చర్చలు జరుపుతున్నారు. నిన్న రాత్రి బీజేపీ, అజిత్ పవార్ మధ్య ఒప్పందం కుదరడంలో భూపేంద్ర కీలకభూమిక వహించారు. దశాబ్దాల రాజకీయ అనుభవం ఉన్న శరద్ పవార్ అంతటివాడు కూడా ఏం జరుగుతుందో అంచనా వేసేలోపే సొంత పార్టీలో చీలిక వచ్చిందంటే భూపేంద్ర యాదవ్ ఏ స్థాయిలో చక్రం తిప్పారో అర్థం చేసుకోవచ్చు.
