ఢిల్లీ : ప్రచార ప్రకటనలకు సంబంధించి తనకు రావాల్సిన బకాయిలను రాబట్టుకోవడానికి భారత క్రికెట్ జట్టు మాజీ కెప్టెన్ మహేంద్ర సింగ్ ధోనీ సుప్రీం కోర్టును ఆశ్రయించారు. ఆమ్రపాలి అనే రియల్ ఎస్టేట్ సంస్థకు ధోనీ ప్రచార కర్తగా వ్యవహరించారు. దీనికి సంబంధించి ఆ సంస్థ సుమారు రూ.40 కోట్లు ధోనీకి చెల్లించాల్సి ఉంది. 2009 నుంచి 2016 వరకు ధోనీ ఆ సంస్థకు ప్రచార కర్తగా వ్యవహరించారు. అయితే కొనుగోలుదారులను మోసం చేశారంటూ ఆ సంస్థపై కేసులు నమోదు కాగా, అలాంటి సంస్థకు ప్రచారం చేసినందుకు సామాజిక మాధ్యమాల్లో ధోనీపై విమర్శలు వెల్లువెత్తాయి. దీంతో ధోనీ ఆ సంస్థతో ఒప్పందాలను రద్దు చేసుకున్నాడు. అప్పటి వరకు రావాల్సిన బకాయిలు రూ.38.95 కోట్లను చెల్లించాల్సిందిగా ఆ సంస్థను ఆదేశించాలని ధోనీ అత్యున్నత న్యాయ స్థానాన్ని కోరారు. కాగా కొనుగోలుదారులను మోసం చేసిన కేసులో ఆమ్రపాలి సంస్థపై సుప్రీం కోర్టులో విచారణ జరుగుతోంది. దర్యాప్తు నిమిత్తం సంస్థ చైర్మన్, మేనేజింగ్ డైరెక్టర్, ఇద్దరు డైరెక్టర్లను కోర్టు పోలీసు కస్టడీకి అప్పగించింది.