ಬೆಳಗಾವಿ, ಸೆ. 9: ಪಬ್ಜಿ ಗೇಮ್ ಇತ್ತೀಚೆಗೆ ಅದೆಷ್ಟೋ ಯುವಕರನ್ನ ತನ್ನತ್ತ ಸೆಳೆತಿಯುತ್ತಿದ್ದು, ಈ ಗೇಮ್ ವ್ಯಕ್ತಿಯೊಬ್ಬರ ಪ್ರಾಣವನ್ನೇ ತೆಗೆಯುವ ಸ್ಥಿತಿಯನ್ನ ತಲುಪುವಂತೆ ಮಾಡಿದೆ.
ಹಾಗೆಯೇ ಇಲ್ಲೊಬ್ಬ ಪಾಪಿ ಮಗ ಪಬ್ಜಿ ಆಡಲು ತನ್ನ ತಂದೆಯ ಬಳಿ ಇಂಟರ್ನೆಟ್ ಪ್ಯಾಕ್ ಹಾಕಿಸಿಕೊಳ್ಳಲು ಹಣ ಕೊಡದಿದ್ದಕ್ಕೆ ತುಂಡು ತುಂಡಾಗಿ ಕೈ, ಕಾಲು ಕತ್ತರಿಸಿದ ಈ ಹೃದಯ ವಿದ್ರಾವಕ ಘಟನೆ ಬೆಳಗಾವಿಯಲ್ಲಿ ನಡೆದಿದೆ. ಬೆಳಗಾವಿ ತಾಲೂಕಿನ ಕಾಕತಿಯಲ್ಲಿ ಈ ಭಯಾನಕ ಘಟನೆ ನಡೆದಿದೆ. ಕಾಕತಿಯ ನಿವಾಸಿಯಾದ ಶಂಕ್ರಪ್ಪಾ ಕಮ್ಮಾರ(59) ಅವರನ್ನು ರಘುವೀರ್ ಕಮ್ಮಾರ(21) ಕೊಲೆ ಮಾಡಿದ್ದಾನೆ.
ಶಂಕ್ರಪ್ಪಾ ಅವರು ಪೊಲೀಸ್ ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದರು. ಮಗ ಪಬ್ಜಿ ಆಟಕ್ಕೆ ಹೆಚ್ಚು ಅಡಿಕ್ಟ್ ಆಗಿದ್ದ ಕಾರಣಕ್ಕೆ ತಂದೆ ಹಲವು ಬಾರಿ ಆತನಿಗೆ ಆಡದಂತೆ ಬುದ್ಧಿ ಹೇಳಿದ್ದರು. ಆದರೆ ಮಗ ಮಾತ್ರ ಯಾರ ಮಾತಿಗೂ ಬೆಲೆ ಕೊಡದೆ ಪಬ್ಜಿ ಆಡಿಕೊಂಡು ಅದರಲ್ಲೇ ಮುಳುಗಿದ್ದನು. ಭಾನುವಾರ ರಘುವೀರ್ ನ ಮೊಬೈಲ್ನಲ್ಲಿ ಇಂಟರ್ನೆಟ್ ಪ್ಯಾಕ್ ಖಾಲಿಯಾಗಿತ್ತು. ಆದ್ದರಿಂದ ಪ್ಯಾಕ್ ಹಾಕಿಕೊಳ್ಳಲು ಆತ ತಂದೆ ಬಳಿ ಹಣ ಕೇಳಿದ್ದನು. ಆದರೆ ತಂದೆ ಹಣ ನೀಡಲು ನಿರಾಕರಿಸಿದ್ದಕ್ಕೆ ಮಗ ಸಿಟ್ಟಿಗೆದ್ದಿದ್ದನು. ಇದೇ ಕೋಪಕ್ಕೆ ರಾತ್ರಿ ತಂದೆ ಮಲಗಿದ್ದಾಗ ಮಾರಕಾಸ್ತ್ರಗಳಿಂದ ಕತ್ತು, ಕಾಲು ಕತ್ತರಿಸಿ ಬೇರ್ಪಡಿಸಿ ವಿಕೃತವಾಗಿ ಮಗ ಕೊಲೆ ಮಾಡಿ ಪರಾರಿಯಾಗಿದ್ದಾನೆ. ಸದ್ಯ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಕಾಕತಿ ಪೊಲೀಸ್ ಠಾಣೆಯಲ್ಲಿ ಈ ಸಂಬಂಧ ಪ್ರಕರಣ ದಾಖಲಾಗಿದ್ದು ಆರೋಪಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ. ಒಟ್ಟಾರೆ ಇದೆಲ್ಲಾ ಯುವಕರನ್ನ ಇಂತ ಹೇಯ ಕೃತ್ಯ ಮಾಡುವಷ್ಟು ಪ್ರೇರೆಪಿಸುತ್ತಿದ್ದು ಮುಂದೆ ಯಾವ ಮಟ್ಟಕ್ಕೆ ಯುವಜನತೆಯನ್ನ ಕೊಂಡೊಯ್ಯುತ್ತದೆ ಅನ್ನೋದರ ಅರಿವು ಸಹ ಇಲ್ಲದಂತಾಗಿದೆ.
