ವಿಶ್ವದ ಪ್ರಮುಖ ಪ್ರವಾಸಿ ಆಕರ್ಷಣೀಯ ದೇಶಗಳಲ್ಲೊಂದು ಭಾರತ. ಭಾರತದ ಸಂಸ್ಕೃತಿ, ಕಲೆ, ಇಲ್ಲಿಯ ಪ್ರಕೃತಿ ಸೌಂದರ್ಯ ಕಣ್ತುಂಬಿಕೊಳ್ಳಲು ಪ್ರತಿನಿತ್ಯ ಸಾವಿರಾರು ವಿದೇಶಿಯರು ಭಾರತಕ್ಕೆ ಭೇಟಿ ನೀಡುತ್ತಾರೆ. ವಿಶ್ವ ಪ್ರವಾಸೋದ್ಯಮ ದಿನದ ಅಂಗವಾಗಿ ಭಾರತದಲ್ಲಿ ಅತೀ ಹೆಚ್ಚು ಪ್ರವಾಸಿಗರನ್ನು ಸೆಳೆಯುವ ಸ್ಥಳಗಳ ಪಟ್ಟಿ ಇಲ್ಲಿ ನೀಡಲಾಗಿದೆ.
ಆಗ್ರಾ
ವಿಶ್ವವಿಖ್ಯಾತ ತಾಜ್‌ಮಹಲ್‌ ಇಲ್ಲಿಯ ಪ್ರಮುಖ ಆಕರ್ಷಣೆ. ಇದಲ್ಲದೆ ಆಗ್ರಾ ಕೋಟೆ, ಮೊಘಲ್‌ ಗಾರ್ಡನ್ಸ್, ಮೆಹ್ತಾಬ್ ಬಾಗ್, ಮದರ್‌ ಥೆರೇಸಾ ಮಿಷನರಿ ಚಾರಿಟಿ, ಮೋತಿ ಮಸೀದಿ, ಜಮ್ಮಾ ಮಸೀದಿ ಹೀಗೆ ಮುಂತಾದ ಸ್ಥಳಗಳು ಕೂಡ ಪ್ರವಾಸಿಗರನ್ನು ಸೆಳೆಯುತ್ತಿವೆ.
ಆಗ್ರಾಕ್ಕೆ ಭೇಟಿ ನೀಡುವುದಾದರೆ ಅಕ್ಟೋಬರ್‌ನಿಂದ ಮಾರ್ಚ್ ಸೂಕ್ತ. ಇಲ್ಲಿಗೆ ಭೇಟಿ ನೀಡಿದವರು ಇಲ್ಲಿಯ ಮೊಘಲಾಯ್‌ ಶೈಲಿಯ ಆಹಾರಕ್ಕೆ ಮನಸೋಲುವುದಂತು ಗ್ಯಾರಂಟಿ.
ದೆಹಲಿ
ವಿದೇಶಿಯರು ಅತೀಹೆಚ್ಚು ಭೇಟಿ ನೀಡುವ ಮತ್ತೊಂದು ಸ್ಥಳವೆಂದರೆ ಭಾರತದ ರಾಜಧಾನಿ ಹೊಸದಿಲ್ಲಿ. ಕೆಂಪುಕೋಟೆ, ಕುತುಬ್ ಮಿನಾರ್‌, ಲೋಟಸ್‌ ಟೆಂಪಲ್‌, ಅಕ್ಷರಧಾಮ, ರಾಷ್ಟ್ರಪತಿಭವನ್‌ ಇವೆಲ್ಲ ದೆಹಲಿಯ ಪ್ರಮುಖ ಪ್ರವಾಸಿ ಆಕರ್ಷಣೀಯ ಸ್ಥಳಗಳಾಗಿವೆ.
ಜೈಪುರ್‌
ಇಲ್ಲಿಗೆ ಭೇಟಿ ನೀಡಿದರೆ ರಾಜಾಸ್ಥಾನದ ಭವ್ಯ ಪಾರಂಪರೆ ಕಣ್ತುಂಬಿಕೊಳ್ಳಬಹುದು.
ಹಂಪಿ
ಇಲ್ಲಿಯ ವಾಸ್ತುಕಲೆ ವಿಶ್ವಪ್ರಸಿದ್ಧವಾದದ್ದು. ವಿಜಯನಗರ ಸಾಮ್ರಾಜ್ಯದ ಗತವೈಭವ ಸಾರುವ ವಾಸ್ತುಶಿಲ್ಪವನ್ನು ಕಣ್ತುಂಬಿಕೊಳ್ಳಲು ಹಾಗೂ ಹಂಪಿಯ ಕುರಿತು ಅಧ್ಯಯನ ಮಾಡಲು ಪ್ರವಾಸಿಗರು ಭೇಟಿ ನೀಡುತ್ತಾರೆ.
ಗೋವಾ
ಭಾರತದಲ್ಲಿ ಬೀಚ್‌ ಅಂದ್ರೆ ತಕ್ಷಣ ನೆನಪಿಗೆ ಬರುವುದು ಗೋವಾ ಬೀಚ್‌ಗಳು. ಮೋಜು, ಮಸ್ತಿಗಾಗಿ ವಿದೇಶಿಯರು ಗೋವಾ ಬೀಚ್‌ಗಳಿಗೆ ಭೇಟಿ ನೀಡುತ್ತಾರೆ.
ಮುಂಬಯಿ
ಗೇಟ್‌ ಆಫ್‌ ಇಂಡಿಯಾ, ಫಿಲಂ ಸಿಟಿ, ಹಜ್ ಅಲಿ ದರ್ಗಾ, ಈಸೆಲ್‌ ವರ್ಲ್ದ್‌ ಇವೆಲ್ಲಾ ಇಲ್ಲಿಯ ಪ್ರಮುಖ ಆಕರ್ಷಣೀಯ ತಾಣಗಳು.
ಮೈಸೂರು
ವಿಶ್ವವಿಖ್ಯಾತ ದಸರಾದಿಂದಾಗಿ ಸಾಂಸ್ಕೃತಿಕ ನಗರಿ ಮೈಸೂರು ತುಂಬಾ ಪ್ರಸಿದ್ಧಿಯನ್ನು ಪಡೆದಿದ್ದು ಸಾವಿರಾರು ವಿದೇಶಿಯರು ಇಲ್ಲಿಗೆ ಭೇಟಿ ನೀಡುತ್ತಾರೆ. ಈ ಪ್ರಮುಖ ಸ್ಥಳಗಳಲ್ಲದೆ ಮುನ್ನಾರ್‌, ವಾರಾಣಸಿ, ಉದಯ್‌ಪುರ್‌ ಮುಂತಾದ ಸ್ಥಳಗಳೂ ವಿದೇಶಿಯರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ.
