ಮಾ, 26, ನ್ಯೂಸ್ ಎಕ್ಸ್ ಪ್ರೆಸ್: 31 ವರ್ಷದ ವ್ಯಕ್ತಿಯೊಬ್ಬ ಪತ್ನಿಯನ್ನು ಬಂಧಿಸಿಟ್ಟು ನೆರೆಮನೆಯಾತನಿಗೆ ಮತ್ತು ಸಂಬಂಧಿಕನಿಗೆ ಅತ್ಯಾಚಾರ ಮಾಡಲು ಅವಕಾಶ ಮಾಡಿಕೊಟ್ಟಿರುವ ಘೋರ ಘಟನೆ ಹರಿಯಾಣಾದಲ್ಲಿ ಬೆಳಕಿಗೆ ಬಂದಿದೆ. ಆತ ಕುಡಿಯಲು ಹಣ ಸಂಗ್ರಹಿಸಲು ಹೀಗೆ ಮಾಡಿದ್ದಾನೆ ಎಂದು ತಿಳಿದು ಬಂದಿದೆ. ಮೂರು ಮಕ್ಕಳ ತಾಯಿಯಾಗಿರುವ ಪೀಡಿತೆ ಪೊಲೀಸರಿಗೆ ನೀಡಿರುವ ದೂರಿನ ಪ್ರಕಾರ ಆಕೆಯ ಪತಿ ಕುಡಿತದ ದಾಸನಾಗಿದ್ದು ಪತ್ನಿ ಮೇಲೆ ಅತ್ಯಾಚಾರ ಎಸಗುತ್ತಿದ್ದ. ಬಳಿಕ ಆಕೆಯನ್ನು ಬಂಧಿಸಿಟ್ಟು ಅತ್ಯಾಚಾರ ಮಾಡಲು ಇಬ್ಬರನ್ನು ಆಹ್ವಾನಿಸಿದ್ದ.  ಅವರಿಬ್ಬರಿಂದ ನಾನು ಅತ್ಯಾಚಾರಕ್ಕೊಳಗಾದೆ. ಮರುದಿನ ಮತ್ತೆ ಅವರು ಅತ್ಯಾಚಾರ ಎಸಗಲು ಬಂದರು. ನಾನದಕ್ಕೆ ವಿರೋಧಿಸಿದಾಗ ಮನಬಂದಂತೆ ಥಳಿಸಿದ ಪತಿ ಸಾಯಿಸುವುದಾಗಿ ಬೆದರಿಕೆ ಹಾಕಿದ. ತಕ್ಷಣ ನಾನು ಮಕ್ಕಳೊಂದಿಗೆ ಮನೆ ಬಿಟ್ಟು ಬಂದೆ ಎಂದಾಕೆ ಅಳಲು ತೋಡಿಕೊಂಡಿದ್ದಾಳೆ.  ಮಾರ್ಚ್ 17ರಂದು ಇದೆಲ್ಲ ಮಹಿಳೆಯ ತಾಯಿಯ ಗಮನಕ್ಕೆ ಬಂದಿದ್ದು ತಕ್ಷಣ ಆಕೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾಳೆ.  ಬಿಚೋರ್ ಪೊಲೀಸ್ ಠಾಣೆಯಲ್ಲಿ ಐಪಿಸಿಯ 376 ಡಿ (ಗ್ಯಾಂಗ್ ರೇಪ್), 120 ಬಿ (ಕ್ರಿಮಿನಲ್ ಪಿತೂರಿ) ಮತ್ತು 34 (ಸಾಮಾನ್ಯ ಉದ್ದೇಶ) ವಿಭಾಗಗಳ ಅಡಿಯಲ್ಲಿ ಮೂವರು ಆರೋಪಿಗಳ ವಿರುದ್ಧ ಎಫ್ಐಆರ್ ದಾಖಲಿಸಲಾಗಿದೆ.  ಮಹಿಳೆಯ ಪತಿಯನ್ನು ಬಂಧಿಸಲಾಗಿದ್ದು ಮತ್ತಿಬ್ಬರು ತಲೆಮರೆಸಿಕೊಂಡಿದ್ದಾರೆ.