ಬೆಂಗಳೂರು, ಅ. 12: ಅಭಿವೃದ್ಧಿ ಪ್ರಾಧಿಕಾರ(ಬಿಡಿಎ)ದ ಕೇಂದ್ರ ಕಚೇರಿಯಲ್ಲಿಮತ್ತೆ ಇಂಟರ್ನೆಟ್ ಸಮಸ್ಯೆ ತಲೆದೋರಿದ್ದು, ಇ-ಕಡತಗಳ ವಿಲೇವಾರಿ ಹಾಗೂ ನಾಗರಿಕ ಸೌಲಭ್ಯ ವಿತರಣೆಗೆ ಅಡ್ಡಿಯಾಗಿದೆ.
ಸೆ.10 ರಿಂದ ಮತ್ತೆ ಇಂಟರ್ನೆಟ್ ಸಮಸ್ಯೆಯಿಂದಾಗಿ ಒಂದು ವಿಭಾಗದಿಂದ ಇನ್ನೊಂದು ವಿಭಾಗಕ್ಕೆ ರವಾನಿಸಬೇಕಿರುವ ಕಡತಗಳ ವಿಲೇವಾರಿ ಸ್ಥಗಿತಗೊಂಡಿದೆ. ಸಾರ್ವಜನಿಕರಿಗೆ ಸಂಬಂಧಿಸಿದ ಕಡತಗಳನ್ನು ಪರಾಮರ್ಶಿಸಲು ಸಾಧ್ಯವಾಗಿಲ್ಲ. ಜತೆಗೆ ನಿವೇಶನಗಳ ಸ್ವಾಧೀನ ಪ್ರಮಾಣಪತ್ರದಂತಹ ಆನ್ಲೈನ್ ಸೇವೆ ವ್ಯತ್ಯಯಗೊಂಡಿದೆ. ಹಾಲಿ ಬಿಎಸ್ಎನ್ಎಲ್ ನಿಂದ ಬ್ರಾಡ್ ಬ್ಯಾಂಡ್ ಸೇವೆ ಪಡೆದಿದ್ದರೂ, ಬಾಕಿ ಬಿಲ್ ಪಾವತಿಸದ ಕಾರಣ ಕಳೆದ ತಿಂಗಳ್ಯಾಂತದಲ್ಲಿ ಇಡೀ ಪ್ರಾಧಿಕಾರದಲ್ಲಿ ಇಂಟರ್ನೆಟ್ ಬಂದ್ ಆಗಿತ್ತು.
ಇದರ ಬಳಿಕ ಪ್ರಾಧಿಕಾರವು ಬಿಎಸ್ಎನ್ಎಲ್ ಬಾಕಿ ಹಣ ಪಾವತಿಸಿದ ಬಳಿಕ ಇಂಟರ್ನೆಟ್ ಸೇವೆಯನ್ನು ಮರುಸ್ಥಾಪಿಸಲಾಗಿತ್ತು. ಇದೀಗ ಮತ್ತೆ ತಾಂತ್ರಿಕ ನೆಪವೊಡ್ಡಿ ಪ್ರಾಧಿಕಾರದ ಇಡಿಪಿ ವಿಭಾಗವು ಇಂಟರ್ನೆಟ್ ಸೌಲಭ್ಯವನ್ನು ಸಮರ್ಪಕವಾಗಿ ನಿರ್ವಹಿಸುತ್ತಿಲ್ಲ. ಖಾಸಗಿ ಬ್ರಾಡ್ಬ್ಯಾಂಡ್ ಕಂಪನಿ ‘ಎಸಿಟಿ’ಗೆ ಮಣೆ ಹಾಕುವ ನಿಟ್ಟಿನಲ್ಲಿ ಬಿಎಸ್ಎನ್ಎಲ್ ಸೇವೆಗೆ ಕೊಕ್ ನೀಡಲು ಇಂತಹ ಹುನ್ನಾರವನ್ನು ಬಿಡಿಎ ಅಧಿಕಾರಿಗಳೇ ನಡೆಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.
ಅಧಿವೇಶನದ ಮಾಹಿತಿಗೂ ಅಡ್ಡಿ
ಹಾಲಿ ನಡೆಯುತ್ತಿರುವ ವಿಧಾನಮಂಡಲ ಅಧಿವೇಶನವು ಶನಿವಾರವೂ ನಡೆಯಲಿದೆ. ಎರಡನೇ ಶನಿವಾರವಾಗಿದ್ದರಿಂದ ನೌಕರರು ರಜೆಯ ಮೂಡ್ನಲ್ಲಿದ್ದರು. ಸಚಿವಾಲಯದಿಂದ ಸೂಚನೆ ಬಂದಿರುವ ಹಿನ್ನೆಲೆಯಲ್ಲಿ ಬಿಡಿಎ ಕೇಂದ್ರ ಕಚೇರಿಯ ಎಲ್ಲಾವಿಭಾಗಗಳು ಎಂದಿನಂತೆ ಕಾರ್ಯನಿರ್ವಹಿಸಲಿದೆ. ಆಯಾ ವಿಭಾಗಗಳ ಅಧಿಕಾರಿ/ಸಿಬ್ಬಂದಿ ಕಡ್ಡಾಯವಾಗಿ ಶನಿವಾರದಂದು ಕಚೇರಿಗೆ ಆಗಮಿಸುವಂತೆ ಸೂಚಿಸಲಾಗಿದೆ.
ಕಲಾಪಕ್ಕೆ ತುರ್ತಾಗಿ ಮಾಹಿತಿ ಬೇಕಿದ್ದಲ್ಲಿ ಅದನ್ನು ರವಾನಿಸಲು ಇಂಟರ್ನೆಟ್ ಸೌಲಭ್ಯವೇ ಇಲ್ಲ. ಸ್ವತ: ಆಯುಕ್ತರ ಕಚೇರಿಗೆ ಸಂಪರ್ಕಿಸಿರುವ ಬ್ರಾಡ್ಬ್ಯಾಂಡ್ ಸೌಲಭ್ಯ ಕೂಡ ಸಮರ್ಪಕವಾಗಿಲ್ಲ. ಅಧಿಕಾರಿಗಳನ್ನು ಸಂಪರ್ಕಿಸಿದಾಗ’ಸದ್ಯ ತಾಂತ್ರಿಕ ಕಾರಣದಿಂದ ಇಂಟರ್ನೆಟ್ ಸೇವೆ ನಿಧಾನಗೊಂಡಿದೆ. ಎರಡು ದಿನಗಳಲ್ಲಿ ಸಮಸ್ಯೆ ನಿವಾರಣೆಯಾಗಲಿದೆ. ಆ ಬಳಿಕ ಯಾವುದೇ ತೊಂದರೆ ಇರುವುದಿಲ್ಲ, ಎಂಬ ಸಮಜಾಯಿಷಿ ದೊರೆತಿದೆ.