ಬೆಂಗಳೂರು: ಕರ್ನಾಟಕ ಕ್ರೀಡಾ ಲೋಕದಲ್ಲಿ ಕಪ್ ನಮ್ದೇ ಅನ್ನೋ ಡೈಲಾಗ್ ಸಖತ್ತಾಗೇ ಸುದ್ದಿ ಮಾಡುತ್ತಿದೆ. ಅದಕ್ಕೆ ತಕ್ಕಹಾಗೇ ಐಪಿಎಲ್ನಲ್ಲಿ ಬೆಂಗಳೂರು ತಂಡ ಪ್ರದರ್ಶನ ನೀಡಿಲ್ಲ. ಆದರೆ, ಕೆಲವೇ ದಿನಗಳ ಹಿಂದಷ್ಟೇ ಬೆಂಗಳೂರು ಬುಲ್ಸ್ ಈ ಪದಕ್ಕೆ ಅರ್ಥ ತಂದುಕೊಟ್ಟಿತ್ತು. ಇದೀಗ ಬ್ಯಾಡ್ಮಿಂಟನ್ನಲ್ಲೂ ಈ ಮಾತು ಸಾರ್ಥಕವಾಗಿದೆ.
ನಾಲ್ಕನೇ ಆವೃತ್ತಿಯ ಬ್ಯಾಡ್ಮಿಂಟನ್ ಪ್ರೀಮಿಯರ್ ಲೀಗ್ನಲ್ಲಿ ಬೆಂಗಳೂರು ರ್ಯಾಪ್ಟರ್ಸ್ ತಮ್ಮ ಸಾಮರ್ಥ್ಯ ತೋರಿದ್ದಾರೆ. ಕಿದಂಬಿ ಶ್ರೀಕಾಂತ್ ನೇತೃತ್ವದಲ್ಲಿ ಅತ್ಯುತ್ತಮ ಸಾಧನೆ ಮಾಡಿದ ಬೆಂಗಳೂರು ತಂಡ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ತೀವ್ರ ಹಣಾಹಣಿಯಿಂದ ನಡೆದ ಪಂದ್ಯದಲ್ಲಿ ಆಲ್ರೌಂಡ್ ಪ್ರದರ್ಶನ ನೀಡಿದ ರ್ಯಾಪ್ಟರ್ಸ್ ಮುಂಬೈ ರಾಕೆಟ್ಸ್ ತಂಡವನ್ನು ಸೋಲಿಸಿದೆ.
ಭಾನುವಾರ ಬೆಂಗಳೂರಿನ ಕಂಠೀರವ ಇನ್ ಡೋರ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ 4-3 ಅಂತರದಲ್ಲಿ ಮುಂಬೈ ತಂಡವನ್ನು ಬಗ್ಗುಬಡಿಯುವಲ್ಲಿ ಬೆಂಗಳೂರು ತಂಡ ಯಶಸ್ವಿಯಾಗಿದೆ. ಮುಂಬೈ ಟ್ರಂಪ್ ಮ್ಯಾಚ್ ಆಗಿ ಆಯ್ಕೆ ಮಾಡಿಕೊಂಡ ಮಿಕ್ಸಡ್ ಡಬಲ್ಸ್ನಲ್ಲಿ ಕಿಮ್ ಜಂಗ್ ಬೆರ್ನಾಡೆತ್ ಜೋಡಿ 15-08, 15-14 ಅಂತರದಲ್ಲಿ ಮಾರ್ಕೆನ್-ಲಾರೆನ್ ಜೋಡಿ ವಿರುದ್ಧ ಶುಭಾರಂಭ ಮಾಡಿತ್ತು. ಆ ನಂತರ ನಡೆದ ಪುರುಷರ ಸಿಂಗಲ್ಸ್ನಲ್ಲಿ ಬೆಂಗಳೂರು ತಂಡದ ನಾಯಕ ಕಿದಂಬಿ ಶ್ರೀಕಾಂತ್ 15-7, 15-10 ಸೆಟ್ಗಳ ಅಂತರದಲ್ಲಿ ಗೆದ್ದು ಮತ್ತೊಂದು ಜಯ ತಂದು ಕೊಟ್ರು.