ಬೆಂಗಳೂರು: WPLನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧದ ಪಂದ್ಯದಲ್ಲಿ ಆರ್‌ಸಿಬಿ ತಂಡ ಕೇವಲ 1 ರನ್‌ನಿಂದ ಸೋತಿತು. ಕೊನೆಯ ಎಸೆತದಲ್ಲಿ ಬಂದ ಫಲಿತಾಂಶದಲ್ಲಿ ಮೆಗ್‌ ಲ್ಯಾನಿಂಗ್‌ ಪಡೆ ರೋಚಕ ಗೆಲುವು ಸಾಧಿಸಿತು. ಆದರೆ, ಡೆಲ್ಲಿ ಆಟಗಾರ್ತಿಯರ ಕ್ರೀಡಾಸ್ಫೂರ್ತಿ ಅಭಿಮಾನಿಗಳ ಮನಗೆದ್ದಿತು. ಗೆಲುವಿನ ಸಂಭ್ರಮದ ನಡುವೆಯೂ ಆರ್‌ಸಿಬಿ ಆಟಗಾರ್ತಿಯರನ್ನು ಸಂತೈಸಿದರು.
ಪಂದ್ಯದಲ್ಲಿ ಆಕರ್ಷಕ ಅರ್ಧಶತಕ ಸಿಡಿಸಿದ ರಿಚಾ ಘೋಷ್‌, ಇನ್ನೇನು ತಂಡವನ್ನು ಗೆಲುವಿನ ದಡ ಸೇರಿಸುವ ಹಂತದಲ್ಲಿದ್ದರು. ಕೊನೆಯ ಎಸೆತದಲ್ಲಿ ಆರ್‌ಸಿಬಿ ಗೆಲುವಿಗೆ ಕೇವಲ 2 ರನ್‌ಗಳ ಅಗತ್ಯವಿತ್ತು. ಆದರೆ, ಒಂದು ರನ್‌ ಓಡುವುದು ಕೂಡಾ ರಿಚಾ ಅವರಿಂದ ಸಾಧ್ಯವಾಗಲಿಲ್ಲ. ರನೌಟ್‌ ಆದ ರಿಚಾ ಮೈದಾನದಲ್ಲೇ ಕುಸಿದರು.
ಅತ್ತ ಮತ್ತೊಂದು ಬದಿಯಲ್ಲಿ ಓಡುತ್ತಿದ್ದ ಶ್ರೇಯಾಂಕ ಕೂಡಾ, ಸೋಲಿನ ನೋವಿಂದ ಕುಸಿದು ಬಿಕ್ಕಿ ಬಿಕ್ಕಿ ಅತ್ತಿದ್ದಾರೆ. ವೀರೋಚಿತ ಸೋಲನ್ನು ಅರಗಿಸಿಕೊಳ್ಳುವುದು ಯುವ ಆಟಗಾರ್ತಿಯರಿಂದ ಸಾಧ್ಯವಾಗಲಿಲ್ಲ.
ರಿಚಾ ಮತ್ತು ಶ್ರೇಯಾಂಕ ಇಬ್ಬರ ಕಣ್ಣಿನಲ್ಲೂ ನೀರು ತುಂಬಿತ್ತು. ಇಬ್ಬರೂ ನೆಲಕ್ಕೆ ಮುಖ ಮಾಡಿ ಅತ್ತರು. ಅತ್ತ ಗೆಲವಿನ ಸಂಭ್ರಮದಲ್ಲಿದ್ದ ಡೆಲ್ಲಿ ಕ್ಯಾಪಿಟಲ್ಸ್‌ ಆಟಗಾರ್ತಿಯರು ತಮ್ಮ ಸಂಭ್ರಮದ ನಡುವೆಯೂ ರಿಚಾ ಮತ್ತು ಶ್ರೇಯಾಂಕರನ್ನು ಸಮಾಧಾನಪಡಿಸಿದರು. ಪಂದ್ಯವನ್ನು ರೋಚಕ ಹಂತದವರೆಗೆ ಕೊಂಡೊಯ್ದ ಅವರ ಪ್ರಯತ್ನವನನ್ನು ಶ್ಲಾಘಿಸಿದರು.
ಈ ನಡುವೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಗೆದ್ದ ಜೆಮಿಮಾ ರೋಡ್ರಿಗಸ್‌ ಮಾತುಗಳು ಮನಗೆದ್ದವು. ನನಗೆ ರಿಚಾ ಕುರಿತು ಬೇಸರವಾಗುತ್ತಿದೆ. ಆದರೂ ನಾವು ಗೆದ್ದಿರುವುದಕ್ಕೆ ಸಂತೋಷವಾಗಿದೆ. ಇಂದಿನ ಪಂದ್ಯವು ಭವಿಷ್ಯದಲ್ಲಿ ಖಂಡಿತಾ ನೆರವಾಗುತ್ತದೆ ಎಂದು ನಾನು ರಿಚಾಳಿಗೆ ಹೇಳಿದೆ. ಬಹುಶಃ ಅವಳು ವಿಶ್ವಕಪ್ ಫೈನಲ್‌ನಲ್ಲಿ ಗೆಲುವಿನ ರನ್‌ ಬಾರಿಸಿ ಭಾರತವು ಟ್ರೋಫಿಯನ್ನು ಎತ್ತಿ ಹಿಡಿಯಲು ನಮಗೆ ಸಹಾಯ ಮಾಡಬಹುದು ಎಂದು ಜೆಮಿಮಾ ಹೇಳಿದರು.
ಪಂದ್ಯವು ಭಾವುಕ ಕ್ಷಣಗಳಿಗೆ ಸಾಕ್ಷಿಯಾಯ್ತು. ಗೆಲುವಿನ ಜೋಶ್‌ನಲ್ಲಿದ್ದ ಡೆಲ್ಲಿ ಆಟಗಾರ್ತಿಯರು, ಎದುರಾಳಿ ತಂಡದ ವೀರೋಚಿತ ಪ್ರಯತ್ನಕ್ಕೆ ಬೆನ್ನುತಟ್ಟಿದರು. ಈ ಕ್ರೀಡಾಸ್ಫೂರ್ತಿ ಅಭಿಮಾನಿಗಳ ಮನಗೆದ್ದಿತು.
