ಶ್ರೀನಗರ, ಏ. 22 ನ್ಯೂಸ್ ಎಕ್ಸ್ ಪ್ರೆಸ್: ಟ್ರಕ್ ನಲ್ಲಿ ಕೊಂಡೊಯ್ಯಲಾಗ್ತಿದ್ದ ಕೋಟ್ಯಾಂತರ ರೂಪಾಯಿ ಹಣ ಸುಟ್ಟು ಕರಕಲಾದ ಶಾಕಿಂಗ್ ಘಟನೆ ಕಾಶ್ಮೀರದಲ್ಲಿ ನಡೆದಿದೆ. ದಕ್ಷಿಣ ಕಾಶ್ಮೀರದ ಅನಂತ್ ನಾಗ್ ಜಿಲ್ಲೆಯ ಖಾಜಿಗುಂಡ್ ನಲ್ಲಿ ಟ್ರಕ್ ವೊಂದರಲ್ಲಿ ಹಣ ಹಾಗೂ ಇತರೆ ವಸ್ತುಗಳನ್ನ ಸಾಗಿಸಲಾಗ್ತಿತ್ತು. ಈ ವೇಳೆ ಟ್ರಕ್ ಗೆ ಇದ್ದಕ್ಕಿದ್ದಂತೆ ಬೆಂಕಿ ಹೊತ್ತಿಕೊಂಡಿದ್ದು, ಕೋಟ್ಯಾಂತರ ರೂಪಾಯಿ ಹಣ ಬೆಂಕಿಗಾಹುತಿಯಾಗಿದೆ.
ಈ ಟ್ರಕ್ ಶ್ರೀನಗರದಿಂದ ಜಮ್ಮುವಿಗೆ ಹೋಗುತ್ತಿತ್ತು ಎಂದು ತಿಳಿದುಬಂದಿದೆ. ಬೆಂಕಿಗಾಹುತಿಯಾದ ಹಣ 500 ರೂಪಾಯಿ ಮುಖಬೆಲೆಯದ್ದಾಗಿತ್ತು. ಈ ಟ್ರಕ್ ನಲ್ಲಿ ತಾಮ್ರದ ತಂತಿ, ಪಾತ್ರೆಗಳು, ತಗಡು ಹಾಗೂ ಇತರೆ ವಸ್ತುಗಳನ್ನ ಕೊಂಡೊಯ್ಯಲಾಗ್ತಿತ್ತು. ಇದರ ಮಧ್ಯೆ ನೋಟಿನ ಕಂತೆಗಳು ಕೂಡ ಇದ್ದವು. ಟ್ರಕ್ ಗೆ ಬೆಂಕಿ ಹೊತ್ತಿಕೊಂಡ ಬಳಿಕ ವಾಹನದಲ್ಲಿ ಕ್ಯಾಶ್ ಇದ್ದಿದ್ದು ಬಯಲಾಗಿದೆ. ಕೆಳಗೆ ಬಿದ್ದಿದ್ದ ಅರೆಬರೆ ಸುಟ್ಟ ನೋಟುಗಳನ್ನ ಇಲ್ಲಿನ ನಿವಾಸಿಗಳು ಎತ್ತಿಕೊಂಡಿದ್ದಾರೆ.
ಇನ್ನು ಟ್ರಕ್ ಚಾಲಕನನ್ನು ಈ ಬಗ್ಗೆ ವಿಚಾರಿಸಿದಾಗ, ತನ್ನ ವಾಹನದಲ್ಲಿ ಹಣ ಇದ್ದಿದ್ದು ಗೊತ್ತೇ ಇರಲಿಲ್ಲ ಎಂದು ಹೇಳಿದ್ದಾನೆ ಎಂದು ವರದಿಯಾಗಿದೆ. ಸದ್ಯ ಈ ಘಟನೆ ಬಗ್ಗೆ ಜಮ್ಮು ಮತ್ತು ಕಾಶ್ಮೀರ ಪೊಲಿಸರು ತನಿಖೆ ನಡೆಸುತ್ತಿದ್ದಾರೆ.