ಬೆಂಗಳೂರು, ಅ. 30 : ಶೀತ-ಕೆಮ್ಮು ಸೇರಿದಂತೆ ಅನಾರೋಗ್ಯವನ್ನು ತಡೆಗಟ್ಟುವ ಬಗ್ಗೆ ಯಾರೂ ಕೂಡ ಯೋಚಿಸುವುದಿಲ್ಲ.
ಏಕೆಂದರೆ ಸಾಮಾನ್ಯವಾಗಿ ಚಳಿಗಾಲದ ಆರಂಭದಲ್ಲಿ ಕಾಣಿಸಿಕೊಳ್ಳುವ ಸಮಸ್ಯೆಗಳು ವೈರಲ್ ಸೋಂಕಾಗಿರುವ ಸಾಧ್ಯತೆಗಳಿರುತ್ತದೆ. ತಂಗಾಳಿಯಿಂದ ಅಥವಾ ಗಾಳಿಯಲ್ಲಿರುವ ಬ್ಯಾಕ್ಟೀರಿಯಾಗಳಿಂದ ಅಲರ್ಜಿ ಸೇರಿದಂತೆ ಇನ್ನಿತರ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಇಂತಹ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತಿದ್ದಂತೆ ಅಡುಗೆ ಮನೆಯಲ್ಲಿರುವ ಕೆಲ ಪದಾರ್ಥಗಳನ್ನು ಬಳಸಿ ಆರಂಭದಲ್ಲೇ ಪರಿಹಾರ ಕಂಡುಕೊಳ್ಳಬಹುದು. ಅಂತಹ ಕೆಲವೊಂದು ಮನೆಮದ್ದುಗಳನ್ನು ಇಲ್ಲಿ ತಿಳಿಸಲಾಗಿದೆ.
ಉಗುರು ಬೆಚ್ಚಗಿನ ನೀರು: ಗಂಟಲು ಕಿರಿಕಿರಿ ಅಥವಾ ನೋವು, ಮೂಗಿನ ಅಲರ್ಜಿ ಕಂಡು ಬಂದರೆ ನೀವು ಮಾಡಬೇಕಾದ ಮೊದಲ ಕೆಲಸ ತಣ್ಣೀರಿನಿಂದ ದೂರವಿರುವುದು. ಸ್ನಾನಕ್ಕಾಗಲಿ ಅಥವಾ ಕುಡಿಯಲು ಉಗುರು ಬೆಚ್ಚಗಿನ ನೀರನ್ನು ಮಾತ್ರ ಬಳಸಿ.
ಹಾಗೆಯೇ ನೀರಿನಲ್ಲಿ ಉಪ್ಪನ್ನು ಸೇರಿಸಿ ಸಾಧ್ಯವಾದಷ್ಟು ಬಾರಿ ಗಂಟಲನ್ನು ಮುಕ್ಕಳಿಸಬಹುದು. ಹಾಗೆಯೇ ಮೂಗಿಗೆ ಮಲಗುವ ಮುನ್ನ ವಿಕ್ಸ್ ಅನ್ನು ಅನ್ವಯಿಸಿ. ಇದು ನಿಮ್ಮ ಶೀತದ ಸಾಧ್ಯತೆಯನ್ನು ಶೇ. 50 ರಷ್ಟು ಕಡಿಮೆ ಮಾಡುತ್ತದೆ. ಹಾಗೆಯೇ ಶೀತ ಉಂಟಾಗುವುದನ್ನು ತಡೆಯುತ್ತದೆ.

ಅರಿಶಿನ: ಗಂಟಲು ನೋವು ಆರಂಭದಲ್ಲೇ ವಿಪರೀತವಾಗಿದ್ದರೆ ಮಲಗುವ ಮುನ್ನ ಹಾಲಿಗೆ ಅರಿಶಿನವನ್ನು ಹಾಕಿ ಕುಡಿಯುವುದು ಉತ್ತಮ. ಅರಿಶಿನದಲ್ಲಿ ರೋಗಾಣುಗಳನ್ನು ತಡೆಯುವ ಗುಣಗಳು ಹೇರಳವಾಗಿವೆ.

ಜೇನುತುಪ್ಪ-ಶುಂಠಿ: ಬೆಳಿಗ್ಗೆ ಜೇನುತುಪ್ಪ ಮತ್ತು ಶುಂಠಿಯಿಂದ ಮಾಡಿದ ಬಿಸಿ ಚಹಾವನ್ನು ಕುಡಿಯಿರಿ. ಶುಂಠಿ ಮತ್ತು ಜೇನುತುಪ್ಪವು ನಿಮ್ಮ ಗಂಟಲು ನೋವನ್ನು ಶಮನಗೊಳಿಸುತ್ತದೆ.