ఐపీఎల్ 2021 సీజన్‌కి ముందు జరగబోతున్న మెగా వేలానికి పవర్ హిట్టర్ ఆండ్రీ రసెల్‌ని కోల్‌కతా నైట్‌రైడర్స్ ఫ్రాంఛైజీ వదిలేయబోతోందా..? అంటే అవుననే సమాధానాలు వినిపిస్తున్నాయి. ఒంటిచేత్తో మ్యాచ్‌లను గెలిపించగల సామర్థ్యం ఉన్న రసెల్‌‌.. ఐపీఎల్ 2020 సీజన్‌లో ఘోరంగా విఫలమయ్యాడు. ప్రతి మ్యాచ్‌లోనూ భారీ అంచనాలతో బరిలోకి దిగడం ఆఖరికి ఉసూరమనిపించడంతో.. కోల్‌కతాకి అతను అతిపెద్ద భారంగా మారిపోయాడు. ఎంతలా అంటే..? ఐపీఎల్ 2020 సీజన్‌లో 10 మ్యాచ్‌లాడిన రసెల్ చేసిన పరుగులు కేవలం 117 మాత్రమే. బౌలింగ్‌లోనూ అతను 18 ఓవర్లు వేసి తీసిన వికెట్లు ఆరు మాత్రమే. రసెల్‌ ఫెయిల్యూర్ కోల్‌కతా టీమ్‌పై అధిక ప్రభావాన్ని చూపగా.. ఆ జట్టు కనీసం ప్లేఆఫ్‌కి కూడా అర్హత సాధించలేక ఇంటిబాట పట్టిన విషయం తెలిసిందే.వాస్తవానికి ఆండ్రీ రసెల్ లాంటి పవర్ హిట్టర్ తమ జట్టులో ఒకరు ఉండాలని ఐపీఎల్‌లో ప్రతి ఫ్రాంఛైజీ కోరుకునేలా ఐపీఎల్ 2019 సీజన్‌లో అతని ప్రదర్శన ఉంది. ఆ సీజన్‌లో 14 మ్యాచ్‌లాడిన రసెల్ ఏకంగా 204.81 స్ట్రైక్‌రేట్‌తో 510 పరుగులు చేశాడు. ఇందులో 52 సిక్సర్లు, 31 ఫోర్లు ఉండగా.. 4 హాఫ్ సెంచరీలూ ఉన్నాయి. కానీ.. ఐపీఎల్ 2020 సీజన్‌లో రసెల్ కేవలం 9 ఫోర్లు, 9 సిక్సర్లు మాత్రమే కొట్టాడు. దానికి తోడు అతడ్ని మోకాలి గాయం వేధిస్తూ వచ్చింది. సీజన్‌లో కొన్ని మ్యాచ్‌ల్లో అతను కనీసం బంతిని కూడా సౌకర్యంగా కిందకి వంగి అందుకోలేకపోవడం కనిపించింది. ఇక డైవ్ సంగతి సరేసరి. దాంతో.. ఈ రూ.8.50 కోట్ల ఆండ్రీ రసెల్‌ని వేలంలోకి వదిలేయాలని కోల్‌కతా ఫ్రాంఛైజీ నిర్ణయించుకున్నట్లు తెలుస్తోంది.ఆండ్రీ రసెల్ టీమ్‌లో ఉండటం.. కోల్‌కతాకి పెద్ద బలం. కానీ.. ఐపీఎల్ 2020 సీజన్‌లో అతని పేలవ ఫామ్ టీమ్‌కి అతిపెద్ద బలహీనతగా మారిపోయి జట్టు మొత్తాన్ని ఒత్తిడిలోకి నెట్టేసింది. ఎంతలా అంటే..? రసెల్ ఔటైతే.. కోల్‌కతా పని ముగిసినట్లే..! అనే స్థాయికి చేరిపోయింది. దానికి తోడు.. రసెల్‌పై భారీ అంచనాలు.. కోల్‌కతా టీమ్‌లో సమష్టితత్వాన్ని కూడా దెబ్బతీసింది. దాంతో.. రసెల్‌ని వదిలేయడం ద్వారా మళ్లీ టీమ్‌ని గాడిలో పెట్టుకోవాలని కోల్‌కతా ఫ్రాంఛైజీ ఆశిస్తున్నట్లు తెలుస్తోంది. డిసెంబరులో ఐపీఎల్ 2021 సీజన్ మెగా వేలం జరిగే సూచనలు కనిపిస్తున్నాయి.