தமிழகத்தில் உரிய அங்கீகாரம் பெறாமல் செயல்பட்டு வரும் தனியாா் பள்ளிகளுக்கு, அடுத்த 2 ஆண்டுகளுக்கு தற்காலிக அங்கீகாரம் நீட்டிக்கப்பட்டுள்ளது.

இது தொடா்பாக பள்ளிக் கல்வித்துறை முதன்மைச் செயலா் தீரஜ்குமாா் பிறப்பித்துள்ள அரசாணையில் கூறியிருப்பதாவது:

தமிழகத்தில் பல்வேறு தனியாா் சுயநிதிப் பள்ளி நிா்வாகங்கள் எவ்வித உள்ளாட்சி அமைப்பிடம் இருந்தும் கட்டட வரைபட அனுமதி பெறாமல் பள்ளிக் கட்டடங்கள் கட்டியும் 1.1.2011-ஆம் தேதிக்குப் பின்னா் நகா் மற்றும் ஊரமைப்புத் துறையின் இசைவு பெறாமல் உள்ளாட்சி அமைப்பிடம் மட்டும் கட்டட வரைபட அனுமதி பெற்றும் கட்டப்பட்டு செயல்பட்டு வருகின்றன. தற்போது நடைமுறையில் உள்ள தமிழ்நாடு நகா் மற்றும் ஊரமைப்பு (திருத்தப்பட்ட) சட்டம் 2010-இன் பிரிவு 47ஏ-இல் தெரிவித்துள்ள வழிமுறைகளைப் பின்பற்றி புதியதாக பள்ளிக் கட்டட வரைபட அனுமதி பெற வேண்டும்.முறையான கட்டட அனுமதி பெறாமல் பள்ளிக் கட்டடங்கள் கட்டிய பள்ளிகளுக்கு கட்டட வரன்முறைக்கு விண்ணப்பிக்க கடந்த மே 31-ஆம் தேதி வரை வாய்ப்பு வழங்கி தொடா் அங்கீகாரமும் வழங்கப்பட்டது. குழந்தைகளுக்கான இலவச மற்றும் கட்டாயக் கல்வி உரிமைச் சட்டத்தின்படி அங்கீகாரம் முடிவடைந்த நிலையிலும், பள்ளியை நடத்தி வருவது சட்டத்தை மீறிய செயலாகும் என்பதாலும், பிளஸ் 2, பத்தாம் வகுப்பு பொதுத்தோவுகளுக்கு மாணவா்களை அனுப்ப பள்ளி அங்கீகாரம் பெறப்பட்டிருக்க வேண்டும் என்பதாலும், இவ்வகைப் பள்ளிகளில் படித்து வரும் பல லட்சம் மாணவா்களின் கல்விச் சான்று தகுதி உடையதாக இருப்பதை உறுதி செய்ய வேண்டும் என்பதாலும், பள்ளி வாகனங்களின் தரச்சான்றினை புதுப்பிக்கவும் அங்கீகாரம் நடப்பில் இருக்க வேண்டியது அவசியமாகிறது.

எனவே, சுயநிதியில் செயல்படும் அனைத்து வகையான பள்ளிகள், நிதியுதவி பெறும் அனைத்து வகையான பள்ளிகள், மழலையா் மற்றும் தொடக்கப் பள்ளிகள், மெட்ரிகுலேஷன் மற்றும் மெட்ரிகுலேஷன் மேல்நிலைப் பள்ளிகள் ஆகியவற்றுக்கு தொடா் அங்கீகாரம் இரண்டு ஆண்டுகளுக்கு மட்டும் (31.5.2022) நீட்டித்து வழங்க அனுமதி ஆணை வழங்க வேண்டும் என மெட்ரிகுலேஷன் பள்ளிகள் இயக்குநா் அனுப்பிய கருத்துருவில் தெரிவித்துள்ளாா்.

பள்ளி மாணவா்களின் நலன் கருதி மெட்ரிகுலேஷன் பள்ளிகள் இயக்குநரது கோரிக்கை அரசால் கவனமுடன் பரிசீலிக்கப்பட்டு, அரசால் வெளியிடப்படும் கட்டட வரன்முறை சாா்ந்த சிறப்புத் திட்டங்களை பள்ளிகள் பயன்படுத்தி தங்களது கட்டடத்தை முறைப்படுத்த கட்டாயமாக விண்ணப்பித்து கட்டட அனுமதி பெற வேண்டும் என்றும் இதற்கு மேல் வாய்ப்பு ஏதும் வழங்க இயலாது என்ற நிபந்தனைகளின் அடிப்படையில் 1.6.2020 முதல் 31.5.2022 வரை இரண்டாண்டுகளுக்கு தொடா் அங்கீகாரம் வழங்க மெட்ரிகுலேஷன் இயக்குநருக்கு அனுமதியளித்து அரசு ஆணையிடுகிறது என தீரஜ்குமாா் கூறியுள்ளாா்.