ತುಮಕೂರು:ಸೇತುವೆಗೆ ಡಿಕ್ಕಿ ಹೊಡೆದ ಖಾಸಗಿ ಬಸ್ ತಲೆಕೆಳಗಾಗಿ ಬಿದ್ದ ಪರಿಣಾಮ ಮೂರಕ್ಕೂ ಹೆಚ್ಚು ಜನರ ಸ್ಥಿತಿ ಗಂಭೀರವಾಗಿ ಗಾಯಗೊಂಡಿದ್ದು 15 ಜನರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಭಾನುವಾರ ರಾತ್ರಿ ಹೊಸಕೆರೆ-ಹೊವಿನ ಕಟ್ಟೆ ಮಾರ್ಗದಲ್ಲಿ ರಸ್ತೆಯಲ್ಲಿನ ಗೂಬೆಕಲ್ಲು ಹತ್ತಿರವಿರುವ ಸೇತುವೆಗೆ ಖಾಸಗಿ ಬಸ್ ಚಾಲಕ ಅತಿವೇಗವಾಗಿ ಬಂದು ಡಿಕ್ಕಿ ಹೊಡೆದ ರಭಸಕ್ಕೆ ಬಸ್ ಪಲ್ಟಿ ಹೊಡೆದಿದೆ.
ಬಸ್‌ನಲ್ಲಿ 20 ಕ್ಕೂ ಹೆಚ್ಚು ಮಂದಿ ಪ್ರಯಾಣಿಕರಿದ್ದರು . ಗಂಭೀರವಾಗಿ ಗಾಯಗೊಂಡಿದ್ದ ಹೂವಿನಕಟ್ಟೆ ಅನಿತಾ(30), ಹೊಸಪಾಳ್ಯ ರಮೇಶ್ ( 35), ಕುರಿಕಾಟನಹಳ್ಳಿ ನಿಂಗಣ್ಣ ( 60) ಗಂಭೀರವಾಗಿ ಗಾಯಗೊಂಡಿದ್ದು ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಬಸ್ ಕೆಳಗೆ ಸಿಕ್ಕಿಕೊಂಡಿದ್ದ ಕುಂಟರಾಮನಹಳ್ಳಿ ತ್ಯಾಗರಾಜ (30) ಮುಬಾರಕ್,(25) ಹಾಗೂ ಬಸ್ ಕ್ಲೀನರ್ ಹೊನ್ನುಡಿಕೆ ಹ್ಯಾಂಡ್ ಪೋಸ್ಟ್ ನ ಕಿಶೋರ್ (27)ನನ್ನು ಪೋಲಿಸರು, ಸಾರ್ವಜನಿಕರು ನೆರವಿನಲ್ಲಿ ಕಾಪಾಡಿದ್ದಾರೆ.
ಸಣ್ಣಪುಟ್ಟ ಗಾಯಗಳಾದ ಎಂಎನ್ ಕೋಟೆ ಗಂಗಮ್ಮ ( 60), ಮಂಚಲದೊರೆ ಶಂಕರಮ್ಮ (60), ಬೆಣಚಗೆರೆ ತಿಮ್ಮಯ್ಯ (55), ಯರಬಳ್ಳಿ ಹನುಮಂತಯ್ಯ(67), ಮುಚ್ಚವೀರನಹಳ್ಳು ನಾಗರಾಜ್ (48)_ ಮಂಚಲದೊರೆ ಬಸವರಾಜು (57), ಹೂವಿನಕಟ್ಟೆ ಜಯಮ್ಮ (57)ರನ್ನು ಹೊಸಕೆರೆ, ಚೇಳೂರು ಸರ್ಕಾರಿ ಆಸ್ಪತ್ರೆಗೆ ದಾಖಲು ಮಾಡಿ ಚಿಕಿತ್ಸೆ ನೀಡಲಾಗಿದೆ. ಚೇಳೂರು ಪೊಲೀಸ್ ಠಾಣೆಯ ಸಬ್ ಇನ್‌ಸ್ಪೆಕ್ಟರ್ ವಿಜಯ್ ಕುಮಾರ್ ಸ್ಥಳಕ್ಕೆ ದೌಡಾಯಿಸಿ ಗಾಯಾಳುಗಳ ನೆರವಿಗೆ ನಿಂತಿದ್ದಾರೆ.