ಬೆಂಗಳೂರು: ನಮ್ಮ ಇತ್ತೀಚಿನ ಜೀವನದಲ್ಲಿ ನಮ್ಮ ಸೌಂದರ್ಯವನ್ನು ಕಾಪಾಡಿಕೊಳ್ಳುವುದು ತುಂಬಾ ದೊಡ್ಡ ಸಮಸ್ಯೆಯಾಗಿದೆ. ಹೆಣ್ಣು ಮಕ್ಕಳಾಗಲಿ ಗಂಡು ಮಕ್ಕಳಾಗಲಿ ತಮ್ಮ ಸೌಂದರ್ಯಕ್ಕೆ ಹೆಚ್ಚು ಪ್ರಾಮುಖ್ಯತೆಯನ್ನು ನೀಡುತ್ತಾರೆ. ನಮ್ಮ ಸೌಂದರ್ಯವನ್ನು ಕಾಪಾಡಿಕೊಳ್ಳಲು ಹಲವಾರು ರೀತಿಯ ಕೆಮಿಕಲ್ ಗಳನ್ನು ಬಳಸುತ್ತಾರೆ ಇದರಿಂದ ನಮ್ಮ ಚರ್ಮಕ್ಕೆ ಹಾನಿ ಉಂಟಾಗುತ್ತದೆ. ನಮ್ಮ ಮನೆಯಲ್ಲಿ ಸಿಗುವಂತಹ ಪದಾರ್ಥಗಳಲ್ಲಿ ನಮ್ಮ ಸೌಂದರ್ಯವನ್ನು ನಾವು ಹೆಚ್ಚಿಸಿಕೊಳ್ಳಬಹುದು.
ನೀರು ನಮ್ಮ ದೇಹಕ್ಕೆ ಅತ್ಯಂತ ಅಗತ್ಯವಾಗಿರುವ ಅಂಶಗಳಲ್ಲಿ ಒಂದು. ಆರೋಗ್ಯದ ಜೊತೆ ನಮ್ಮ ಸೌಂದರ್ಯವನ್ನು ಕಾಪಾಡಿಕೊಳ್ಳಲು ಕೂಡ ಸಾಕಷ್ಟು ನೀರು ಕುಡಿಯುವುದು ಅಗತ್ಯ. ನಮ್ಮ ಮುಖದ ಸುಕ್ಕುಗಳು, ಸೂಕ್ಷ್ಮ ರೇಖೆಗಳು ಅಥವಾ ವಯಸ್ಸಾಗುವುದನ್ನು ಹಿಮ್ಮೆಟ್ಟಿಸುವುದರಲ್ಲಿ ನೀರು ಸಹಕಾರಿಯಾಗಿದೆ. ಸುಂದರವಾಗಿ ಕಾಣಲು ಯಾವ್ಯಾವುದೋ ಸೌಂದರ್ಯ ಉತ್ಪನ್ನಗಳನ್ನು ಬಳಸಬೇಕು ಎಂದೇನೂ ಇಲ್ಲ. ನಮ್ಮ ಸುತ್ತಲೂ ಯಥೇಚ್ಛವಾಗಿ ಲಭ್ಯವಿರುವ ನೀರನ್ನು ದಿನವೂ ಹೆಚ್ಚೆಚ್ಚು ಕುಡಿಯುವುದರಿಂದ ನಾವು ಇನ್ನಷ್ಟು ಆರೋಗ್ಯಯುತವಾಗಿ, ಸುಂದರವಾಗಿ ಕಾಣಬಹುದು.
ದಿನವಿಡೀ ನೀರು ಕುಡಿಯುತ್ತಿರುವುದರಿಂದ ನಾವು ತೂಕ ಇಳಿಸಬಹುದು. ಅದರಲ್ಲೂ ಊಟಕ್ಕೆ ಮೊದಲು ಮತ್ತು ಊಟದ ಸಮಯದಲ್ಲಿ ನೀರು ಕುಡಿಯುವುದರಿಂದ ನಿಮಗೆ ಬೇಗ ಹೊಟ್ಟೆ ತುಂಬಿದ ಅನುಭವವಾಗುತ್ತದೆ. ಆದ್ದರಿಂದ ನೀವು ಕಡಿಮೆ ಕ್ಯಾಲೊರಿಗಳನ್ನು ಸೇವಿಸಲು ಸಹಾಯ ಮಾಡುತ್ತದೆ. ಇದರಿಂದ ತೂಕ ಇಳಿಸಿಕೊಳ್ಳಬಹುದು. ತೂಕ ಇಳಿಕೆಯಾದರೆ ನಮ್ಮ ಮುಖದ ಸೌಂದರ್ಯವೂ ಹೆಚ್ಚುತ್ತದೆ.
ನೀವು ಸಾಕಷ್ಟು ನೀರು ಕುಡಿಯುವುದರಿಂದ ನಿಮ್ಮ ಚರ್ಮವನ್ನು ಹೈಡ್ರೀಕರಿಸಬಹುದು. ಇದು ಶುಷ್ಕತೆಯನ್ನು ಕಡಿಮೆ ಮಾಡುತ್ತದೆ ಮತ್ತು ಮೃದುತ್ವವನ್ನು ಹೆಚ್ಚಿಸುತ್ತದೆ. ನಿಮ್ಮ ಚರ್ಮದ ಹೊಳಪನ್ನು ಹೆಚ್ಚಿಸಲು ನೀವು ನೀರನ್ನು ಕುಡಿಯಬಹುದು. ರಂಧ್ರಗಳನ್ನು ತೆರೆಯಲು ಬೆಚ್ಚಗಿನ ನೀರು ಮತ್ತು ರಂಧ್ರಗಳನ್ನು ಮುಚ್ಚಲು ತಣ್ಣನೆಯ ನೀರನ್ನು ನಿಮ್ಮ ಮುಖದ ಮೇಲೆ ಚಿಮುಕಿಸುವುದರ ಜೊತೆಗೆ, ಸಾಕಷ್ಟು ನೀರು ಕುಡಿಯುವುದರಿಂದ ನಿಮ್ಮ ಚರ್ಮದ ಕೋಶಗಳಿಗೆ ಅಗತ್ಯವಾದ ಪೋಷಕಾಂಶಗಳನ್ನು ನೀಡುತ್ತದೆ.
ಬೆಳಗ್ಗೆ ನಿಮ್ಮ ಮುಖ ಊದಿಕೊಂಡಿರುವಂತೆ ನಿಮಗೆ ಅನಿಸಿದರೆ ಅದಕ್ಕೆ ನಿಮ್ಮ ದೇಹಕ್ಕೆ ನೀರಿನ ಕೊರತೆಯೂ ಒಂದು ಕಾರಣ. ಹೀಗಾಗಿ, ನೀರು ಹೆಚ್ಚು ಸೇವಿಸಿ. ನೀರನ್ನು ಜಾಸ್ತಿ ಕುಡಿಯುವುದರಿಂದ ಚಳಿಗಾಲದಲ್ಲಿ ಚರ್ಮ ಒಣಗಿದಂತಾಗಿ, ತುರಿಕೆಯಾಗುವುದನ್ನು ತಡೆಯಬಹುದು. ಚರ್ಮದ ಆರೋಗ್ಯಕ್ಕೂ ನೀರು ಅತ್ಯಗತ್ಯ. ನೀರು ಕುಡಿಯುವುದರಿಂದ ಮುಖದಲ್ಲಿರುವ ಮೊಡವೆಗಳನ್ನು ಕೂಡ ತೊಡೆದುಹಾಕಬಹುದು.